Birîna Tirkiyê ya xedar; „zarokên girtî!"

Ji birîna Tirkiyê ya xedar “ zarokên girtî” hin jî xwîn diherike. Dewleta Tirk pesnê xwe dide ku yekemîn dewlet e ku “cejnekê diyarî zarokan kiriyê.” Lê îro ji 1000´î zêdetir zarok di zîndanên Tirkiyê da ne û pêşeroja jiyana wan tê tarîkirin.

Mînaka dawî ya vê rastiyê di roja 27.01.2010 ´an da derket holê. Keça Kurd a 15 sali Bêrîvan Ş, bi îdiaya ku li Batmanê beşdarî çalakiyek dij-yasayî bûye û kevir avêtiye polêsan, derket ber dadgehê û ji aliyê Dadgeha Taybet ya Desthilatdar ve, di rûniştina yekem da 13 sal û 6 meh ceza xwar. Ji ber biçûkbûna salên wê cezaya wê daxistin 7 sal û 9 mehan.

Bêrîvan û diya wê îdia dikin ku wê beşdarî tu çalakiyan nebûye û ev komployek polêsan e.

Li gor me wisa nebe jî, zîndanîkirina Bêrîvan û zarokên din bi îdiaya “şîar avêtinê” yan “ kevir avêtina wan li polêsan,” beriya her tiştî him ne huqûqî ye û him jî birînek li wijdana mirovatiyê dide. Helwesta mehkemê ne demokratîk e û li gel mafên mirovî nagunce.

Partiya AKPê ku zêdetir 7 salan e desthilatdar e, îdia dike ku wê ji bo çareseriya pirsa Kurd û demokratîzekirina Tirkiyê gavan bavêje. Lê mixabin zîndanîkirina zarokan li gel îdiaya AKPê nagunce. Ji ber vê, raya giştî li ser helwesta AKPê dikeve şikê.

Wezareta Dadiyê di meha 11´an ya 2009´an da amadekariyek kir ku yasaya li dijî zarokên girtî ku di raya giştî da wek “ zaokên kevir davêjin” tên bi navkirin, biguherîne û wan zarokan serbest berde. Lê belê hukumet di vî warî da jî nekarîbû helwestek erênî deyne û vê pêşniyara Wezareta Dadiyê bixe rojeva Parlametoyê û biryarek erênî jê derxîne.

Em wek Konfederasyona Komeleyên Kurdistanê li Ewrûpa/KOMKAR-EU, bang li hukumeta AKPê dikin; 

Ji bo pirsa zarokên girtî bê çareserkirin, di zûtirîn wext da bi gavên lezgîn guhartinên yasayî pêk bîne.

Bang li hêzên demokratîk yên Tirkiyê, rêxistinên sivîl, rewşenbîr û mirovên xwedan wijdan dikin ku ji bo zarokên me ango pêşerojên me ji zîndanan bên derxistin, hestiyar bin.

Bang li Rêxistina Neteweyên Yekbûyî, UNICEF, Yekîtiya Ewrûpa û hukumetên rojava dikin ku hewil bidin di zûtrîn wext da li Tirkiyê yasa bê guhartin û zarokên girtî bên azadkirin.

Her wisa bang li raya giştî ya Kurd û rêxistinên Kurdistanê dikin ku hewil bidin ku zemînê ji ne xêrxwazan ra xweş nekin, zarokên xwe ji kûçe û kolanan xilas bikin, bihêlin bila zarokên me zarotiya xwe bijîn.

Zarokên me pêşerojê me ne, divê em rê nedin ku pêşerojên me tarî û şevereş be!

10.02.2010

Konfederasyona Komeleyên Kurdistanê li Ewrûpa / KOMKAR-EU