KOMKAR li Kopenhagê beşdarî festîvala navnetewî bû     Di roja 28.08.2010’an de bi amadekarîya Şaredarîya Bajarê Mezin a Kopenhagê festîvaleke navnetewî di bin navê ”Københavns Kommunes Internationale Dag 2010” de hate li dar xistin. Ev bi salaye ku ev festîval tê li dar xistin, ku bi dehan komelên bîyanîyan ên li şaredarîya Kopenhagê tê de beşdar dibin.   Festîvala îsal hinkî ji ya salên berê cudatir bû. Îsal zêdeyî 50 komelên bîyanîyan û dezgeh û rêxistinên danîmarqîyan, ku bi kar û barê bîyanîyan û întegrasîyonê ve mijul dibin, û 20 xwaringehên (restaurant) bîyanîyan beşdarî festîvalê bûn. Li wir ji gelik welatên cur be cur komelên beşdar çand û kultura welatê xwe, xwarin û vexwarinên welatê xwe didin nas kirin û agahdarîyên li ser welatê xwe û li ser kar û xebata komela xwe li bajarê Kopenhagê nîşanî mêvanên festîvalê didin. Festîvala îsal li ser rêya ”Nørrebrogade” li taxa ”Nørrebro” hate li dar xistin û bi deh hezaran kesan beşdarî kirin.   Wek her sal Komela Karkerên Kurdistan, KOMKAR-DK jî dîsan bi çadirekê di bin ala Kurdistanê de û bi flama KOMKAR’ê beşdarî festîvalê bû û li ser kar û xebata xwe û rewşa kurd û Kurdistanê agahdarî dan kesên ku çadir zîyaret kirin. Herweha standek ji pirtûkan, CD, al, nexşa Kurdistanê, rozet û hwd. hatibû vekirin û çadir bi dîmenên kurdan û Kurdistanê û ji berhemên destçêkirî hatibû xemilandin. Ji bilî wê nivîsên bi zimanê îngîlîzî û danîmarqî û belavoka KOMKAR’ê a di derheqê referanduma di 12.09.2010’an de hatin belav kirin.   Hêjayî gotinê ye ku gelik kesên danîmarqî û bîyanî û nas û dostan çadira KOMKAR’ê zîyaret kirin û li ser kurdan agahdarî wergirtin.   Serokşaredarê kar û întegrasîyonê, Klaus Bondam, çadira KOMKAR’ê zîyaret kir û kêfxweşîya xwe ji bo beşdarîkirinê anî ziman.   Komela Kultûrî a Kurdên Surîyê û Însîyatîfa Kurd li Danîmark jî bi çadirekê beşdarî di vê festîvala navnetewî de kirin.   Bi giştî festîvala îsal bi şêweyekî gelekî baş û serkeftî derbas bû. Li gor salên berê milet gelekî zêde bû û bernameya festîvalê jî ji axaftinan û ji çalakîyên hûnerî û şanogerî tijî bû.   Yilmaz Yildiz Dema Nû/Kopenhag 30.08.2010 roniwelat@yahoo.dk     Fotoalbum